Mawab, Davao de Oro – Pinatay at inilibing ng mataas na lider ng New People’s Army (NPA) na si Eric Jun Casilao alyas “Ellian” ang kanyang pabigat na kasamahan sa Purok 8, Libuton, Brgy. Andap, New Bataan, Davao de Oro noong buwan ng Abril, 2022.
Ito ang pinatotohanan ni alyas “Vina”, squad supply officer ng Regional Operations Command (ROC) ng Communist Terrorist Group (CTG) na sumuko sa gobyerno noong Abril 27, 2020, kung saan inihayag nito na si Crispin Rollon alyas “Jeffrey”, 52, ay pinatay ng kanilang lider dahil ito ay pabigat na sa kanila habang sila ay tumatakas sa isinasagawang Focused-Military Operations ng 10th Infantry Division, PA.
Ayon kay alyas “Vina”, dahil sa sobrang gutom ay nanghina si Jeffrey at hindi na makalakad kaya binugbog nalang siya at sinakal ni Ka Ellian hanggang sa mamatay ito at inilibing sa may Andap.
Ito ay patunay at nagpapakita lamang ng hindi makataong pagtrato ng NPA sa kanilang mga kasamahan na hindi na napapakinabangan.
Matapos ang kanyang rebelasyon ay kaagad na nagsagawa ng joint operation ang 66th Infantry Battalion under Lieutenant Colonel Julius Munar kasama ang mga tauhan ng New Bataan Municipal Police Station at Municipal Disaster Response Team na nagresulta sa pagkakahukay sa bangkay ni Rollon nito lamang Miyerkules, Mayo 11, 2022.
Si Casilao ay kasalukuyang kalihim ng Southern Mindanao Regional Committee ng CTG na may maraming kasong kriminal mula sa kidnapping at serious illegal detention hanggang sa ilang bilang ng pagpatay. Mayroon din siyang Php5.4 milyon na reward mula sa Department of National Defense – Department of Interior and Local Government Joint Order of Reward.
###
Panulat ni Police Corporal Mary Metche Moraera
