Leon, Iloilo – Arestado ang isang kasapi ng New People’s Army sa operasyon ng Iloilo PNP sa Barangay Jamog-Gines, Leon, Iloilo nitong araw mismo ng halalan, Lunes, Mayo 9. 2022.
Kinilala ni Police Colonel Adrian Acollador, Acting Provincial Director ng Iloilo Police Provincial Office, ang suspek na si Victoria Tumabiao, asawa ni Ricky Tumabiao na isang ring kasapi ng NPA, Vice Secretary ng District Committee II, Southern Front, ng Komite Rehiyon – Panay ng NPA.
Ayon kay Police Colonel Acollador, sa bisa ng Search Warrant, matagumpay na nakumpiska ng mga operatiba ng Iloilo PNP ang isang carbine at magazine na may 14 ammunitions; isang homemade shotgun at magazine na may tatlong ammunitions; isang C-type Improvised Device; at propaganda materials ng Communist Terrorist Group (CTG) NPA.
Ito ay matapos makatanggap ang mga operatiba ng sunod sunod na intelligence report tungkol sa pagtatago ng mga baril at aktibong pagsuporta ng mag-asawa sa teroristang grupo na NPA.
Si Victoria ay agad namang dinala sa Leon Municipal Police Station na isasailalim sa inquest proceedings habang nakatakas naman ang kanyang asawa na si Ricky Tumabiao.
Pinasalamatan naman ni Iloilo Top Cop, Police Colonel Acollador ang publiko sa pagbibigay ng agarang impormasyon sa kapulisan na nagresulta sa matagumpay na pagkaaresto ng suspek at pagkakumpiska ng mga ilegal na baril.
###
