Quezon, Bukidnon – Arestado ang isang magsasaka dahil sa kasong Frustrated Homicide at Liquor Ban sa isinagawang operasyon ng Quezon PNP sa Brgy. Salawagan, Quezon, Bukidnon nito lamang Mayo 8, 2022.
Kinilala ni Police Colonel Jun Mark Lagare, Provincial Director ng Bukidnon Police Provincial Office, ang suspek na si Carlito Samuya y Gumanid, 58, may asawa, magsasaka, residente ng Purok Maningning, Salawagan, Quezon, Bukidnon.
Ayon kay PCol Lagare, nadakip ang suspek bandang 11:45 ng gabi matapos pagsasaksakin gamit ang kutsilyo at pinaniniwalaang nasa ilalim ng impluwensya ng alak habang ginawa ang pananaksak sa kanyang nakababatang kapatid na si Alberto Samuya y Gumanid.
Ayon pa kay PCol Lagare, nagtamo ang biktima ng saksak sa tiyan at kaliwang braso na agad dinala sa hospital.
Nakumpiska naman sa suspek ang isang kutsilyo at limang bote ng alak at nahaharap sa kasong Frustrated Homicide at kasong paglabag sa Omnibus Election Code in relation to Liquor Ban.
Pinaalalahanan naman ni PCol Lagare ang lahat na sumunod sa mga alituntunin at regulasyon at huwag lumabag sa anumang probisyon ng batas.
###
Panulat ni Patrolman Jomhel Tan/RPCADU 10
