Nagtala ng may kabuuang bilang na 996 kataong wanted sa iba’t-ibang krimen ang naaresto ng National Capital Region Police Office (NCRPO) sa isinagawang malawakang kampanya laban sa Most Wanted Persons (MWP) ng Philippine National Police (PNP) sa buong buwan ng Enero 2022.
Sa pahayag ng Regional Director ng NCRPO na si Police Major General Vicente Danao Jr, ang 996 na naitala ay mula sa limang distrito ng NCRPO na may kabuuang datos na 301 most wanted persons, 32 district-level most wanted persons, 269 station-level most wanted persons at 394 na ibang pang wanted persons.
Naitala sa Manila Police District (MPD) ang pinakamalaking datos na may kabuuang 373 kataong arestado na binubuo ng 138 most wanted persons, 26 district-level most wanted persons, 112 station wanted persons at 97 na iba pang wanted persons.
Sinundan ito ng Southern Police District (SPD) na nagtala ng 318; 174 mula sa Northern Police District (NPD) at 108 naman mula sa Eastern Police District.
Samantala, ang Quezon City Police District (QCPD) naman ay nag-ulat ng pinakamababang bilang na 23 kung saan anim (6) dito ay district-level most wanted persons, anim (6) na station level at 11 pang most wanted persons.
Hinimok naman ni PMGen Danao Jr ang kapulisan ng NCRPO na paigtingin pa lalo ang implementasyon ng kampanya laban sa mga Most Wanted Persons, siguraduhing ang hustisya ay makakamit ng mga biktima at madala ang mga nagkasala sa korte upang harapin ang batas.
Source: Philippine News Authority
####
Panulat ni Patrolman Noel Lopez
Great work PNP thanks