Fort Bonifacio, Taguig City – Tinatayang nasa Php148,240 halaga ng hinihinalang shabu ang nasamsam sa siyam na suspek sa magkahiwalay na buy-bust operations ng mga operatiba ng Southern Police District nito lamang Linggo ng ika-6 ng Marso 2022.
Ayon kay PBGen Jimili Macaraeg, District Director, SPD, nadakip ang siyam na suspek sa pinagsanib pwersa ng Station Drug Enforcement Unit o SDEU, Taguig, Muntinlupa, Las Piñas at Parañaque City Police Station.
Unang kinilala ni PBGen Macaraeg ang dalawang suspek na sina Elmor Vergara y Hamid alyas “Elmor”, 48, at Niel Martinez y Nicol, 18, na naaresto ng Station Drug Enforcement Unit-SPD at Taguig City Police sa kahabaan ng Meralco Road, Brgy. New Lower Bicutan bandang alas-3:10 ng hapon.
Sabi ni PBGen Macaraeg, narekober sa kanila ang Php200 buy-bust money, blue coin purse, at 12 heat sealed transparent plastic sachet na naglalaman ng hinihinalang shabu at may timbang na higit-kumulang 7.5 gramo at may Standard Drug Price na Php51,000.
Dagdag pa ni PBGen Macaraeg, dalawang buy-bust operation ang isinagawa ng mga operatiba ng SDEU sa Muntinlupa City.
Una ay sa Purok 4, PNR Site Brgy. Bayanan kung saan naaresto sina Christian Soliguin y Navarro alyas “Jampot”, 32, at Richard Alba y Sanchez, 48, na nahulihan ng Php34,000 at Php300 buy-bust money bandang 7:50 ng gabi.
Ang ikalawang operasyon ay dakong 11:35 PM sa Purok 2 ng magkaparehong barangay na nagresulta sa pagkakaaresto kina Jill Anne Cuya y Mataganas a.k.a “Jill”, 37, at Jay Abarca y San Jose, 41.
Nakumpiska sa dalawa ang tatlong heat sealed transparent plastic sachet na naglalaman ng higit-kumulang 5 gramo ng hinihinalang shabu at tinatayang Php34,000 ang halaga, at Php200 buy-bust money.
Ani pa ni PBGen Macaraeg, dakong alas 8:20 naman ng gabi naaresto sa Sampaguita St., Tramo 1, Brgy. Naglunsad ng mga operatiba ng San Dionisio, Parañaque City at SDEU sina Reynalie Ortega Loria alyas “Jes”, 37, at Ramon Balintong Millan, 33.
Pitong heat sealed transparent plastic sachet na naglalaman ng hinihinalang shabu na tumitimbang ng higit-kumulang 3 gramo na tinatayang Php20,400 ang halaga, isang coin purse at Php1000 buy-bust money naman ang narekober kina Loria at Millan.
Sa lungsod naman ng Las Piñas, nadakip dakong alas-9:00 ng gabi sa Everlasting Homes Brgy Talon 4 ng SDEU si Ricardo Rodriguez y Espayos alyas “Tropa”, 43.
Narekober naman sa kanya ang dalawang heat sealed transparent plastic sachet na hinihinala ring shabu na higit-kumulang 1.3 gramo ang timbang at tinatayang Php8,840 ang halaga, at Php500 buy-bust money.
Lahat ng mga naarestong suspek ay nahaharap sa kasong paglabag sa RA 9165 o Comprehensive Dangerous Drugs Act of 2002.
Tiniyak ni PBGen Macaraeg na ang Pambansang Pulisya ay patuloy na hihigpitan ang kampanya kontra ilegal na droga.
Source: SPD PIO
###
