Matagumpay na nagtapos ang 73 pulis ng Police Regional Office CAR (PRO-CAR) ng Philippine National Police Special Weapons and Tactics (PNP SWAT) Course sa Masigasig Grandstand, Camp Major Bado Dangwa, La Trinidad, Benguet nito lamang ika-27 ng Enero 2025.
Pinangunahan ni Baguio City Mayor Hon. Mayor Benjamin B. Magalong bilang panauhing pandangal ang aktibidad bilang pagbibigay parangal sa tagumpay ng mga pulis kasama ang mga opisyal ng PRO-CAR at mga pamilya at kanilang mga kaibigan.
Tampok sa seremonya ang paggawad sa mga awardees, ceremonial pinning na pinangunahan ng panauhing pandangal at pagpapakita ng mga natapos ng kanilang mga bagong kasanayan sa pamamagitan ng isang skills demonstration.
Sa kanyang pangwakas na pananalita, hinikayat ni Hon. Magalong ang mga nagtapos na gamitin ang kanilang natutunan para sa kaligtasan ng publiko at pagpapanatili ng kapayapaan at binigyang-diin din ang kahalagahan ng kanilang papel sa epektibong pagtugon sa mga kritikal na insidente.
Ang SWAT training ay isa sa pinakamahigpit na pagsasanay ng PNP, na sumasaklaw sa marksmanship, crisis management, at tactical communications upang ihanda ang mga opisyal sa pagharap sa mga kritikal na sitwasyon.
Ang tagumpay ng mga nagtapos ay isang patunay ng kanilang dedikasyon at kahandaan sa paglilingkod sa publiko.
