Nasagip sa isinagawang coordinated operation na pinangunahan ng Regional Special Operations Group (RSOG) ang pitong Vietnamese Nationals sa human trafficking sa ikinasang operasyon sa Barangay 86, Pasay City bandang 8:00 ng gabi nito lamang Martes, Oktubre 22, 2024.
Ayon Kay Police Major General Sidney S Hernia, Acting Regional Director ng National Capital Region Police Office, naging matagumpay ang operasyon dahil sa pagsisikap ng RSOG, RID-NCRPO kasama ang Pasay City Social Welfare and Development Department, Inter-Agency Council Against Trafficking – Department of Justice (IACAT-DOJ), Women and Children Protection Center (WCPC), Regional Mobile Force Battalion – NCRPO, at Pasay City Police Station.
Ito ay kasunod ng ulat mula sa isang concerned citizen na nagsiwalat na ilang Vietnamese na kababaihan ang pinagsamantalahan para sa prostitusyon ng suspek na kinilalang si “Zhao Xing” sa online at face-to-face, pangunahin ang pagtutustos sa mga operator ng POGO.
Matagumay na nailigtas ng pulisya ang pitong Vietnamese Nationals at nahuli naman ang suspek na mahaharap sa mga reklamo para sa paglabag sa mga Seksyon ng Republic Act 10364, na kilala rin bilang “Expanded Anti-Trafficking in Persons Act of 2012.”
Ang Pambansang Pulisya ay patuloy lamang sa pagsugpo sa anumang uri ng kriminalidad sa ating bansa upang walang mabiktima ng karahasan kahit ito man ay mga dayuhan, na may isang layunin na mapanatili ang isang ligtas at mapayapang Bagong Pilipinas.
Source: PIO NCRPO
Panulat ni PSSg Remelin M Gargantos
