Iba, Zambales – Nailigtas ang pitong pasahero ng eroplanong bumagsak sa Search and Rescue Operation ng mga pulisya sa baybayin ng Zambales nitong Huwebes, ika-17 ng Marso 2022.
Kinilala ni Police Colonel Fitz Macariola, Provincial Director ng Zambales Police Provincial Office ang pitong pasahero na sina Pilot in Command Captain Mel Bidayan, Captain Florencio Ruiz, Captain Jamel Reamon, Captain Albrench Sagario, Captain Ian Vincent Agdamag at Captain Robin Austria.
Ayon kay PCol Macariola, bandang 6:00 ng umaga isinagawa ang operation sa may layong 500 meters mula sa baybayin ng Purok 3 Brgy. Sto. Rosario, Iba, Zambales ng mga tauhan ng Zambales Maritime Police katuwang ang mga mangingisda ng Iba, Zambales.
Ayon pa kay PCol Macariola, agad namang dinala ang mga biktima sa President Ramon Magsaysay Provincial Hospital upang magamot.
Dagdag pa niya, ang eroplano ay isang Aero Commander 685 RP-C5230 na pagmamay-ari ng Logistics Enterprise Air Management na matatagpuan sa Pasay, Manila at pinaniniwalaang nagkaproblema sa makina na naging sanhi ng pagbagsak nito.
Samantala, pinuri naman ni PCol Macariola ang kanyang mga tauhan sa matagumpay na search and rescue operation.
Patunay lamang na laging handa ang Pambansang Pulisya sa anumang sakuna o insidente na maaaring mangyari sa lugar na kanilang nasasakupan.
###
