Arestado ang 65-anyos na lalaki ng mga tauhan ng Vincenzo Sagun Municipal Police Station matapos mahuli sa aktong nagdadala ng isang mahabang baril sa Barangay Lumbal Vincenzo Sagun, Zamboanga del Sur noong ika-12 ng Abril, 2025.
Kinilala ni Police Captain Brainhull A Sakkam, Officer-In-Charge ng Vincenzo Sagun Municipal Police Station, ang suspek na si “Martin”.
Nabatid na isang concerned citizen ang nag-report tungkol sa presensya ng isang armadong lalaki sa isang pump boat patungo sa baybayin ng Barangay Lumbal.
Agad na rumesponde ang pulisya at nakita ng mga nagpapatrulyang pulis ang isang mahabang M1 Garand rifle na nakadisplay sa pump boat na pag-aari ng suspek.
Nang hingan ng legal na dokumento para sa baril, nabigo ang suspek na magpakita nito.
Nakumpiska mula sa pag-iingat ng suspek ang isang M1 Garand rifle na may serial number 523963, kasama ang isang garand clip na may anim na bala.
Patuloy ang PNP sa pagsiguro ng kaligtasan ng publiko at pagpapanatili ng kaayusan at katahimikan sa ating pamayanan.
Panulat ni Pat Joyce Franco
