Iloilo – Timbog ang isang lalaki matapos malambat sa ikinasang Entrapment Operation ng Passi PNP sa City Mall, Brgy. Pob. Ilawod, Passi City, Iloilo bandang alas-2:49 ng hapon nitong ika-17 ng Agosto 2023.
Kinilala ni Police Lieutenant Colonel Aron Palomo, Hepe ng Passi City Police Station, ang suspek na si Rolly Persona y Tayo, 62, may asawa, at residente ng Brgy. Alabidhan, Bingawan, Iloilo.
Ayon PLtCol Palomo, naaresto si Rolly matapos itong maaktuhan ng mga operatiba ng nasabing istasyon sa pangingikil nito ng pera sa biktimang si Marlou Gabriel, 44, na isang contractor na residente ng Sta. Barbara, Iloilo.
Narekober kay Rolly ang dalawang cellphone, boodle money at isang red sling bag.
Nasa kustodiya na ng Passi City Police Station ang nadakip na suspek para sa karampatang disposisyon at kasong Robbery Extortion ang kanyang kakaharapin.
Samantala, pinuri ni PBGen Sidney Villaflor, Regional Director ng PRO6 ang mga tauhan ng Passi CPS para sa kanilang mahusay na pagganap ng tungkulin at pinaalalahanan ang mamamayan na maging alerto at maingat.
“Ipagpatuloy lang po ninyo ang pagiging mapagmatyag at pagiging alerto sa ating paligid, sana ay maging silbi itong warning sa mga iba pang mga nag-iisip na gumawa din ng kabulastugan. Hindi po namin kayo titigilan. Sa atin pong mga mamamayan, sana po ay maging alerto at maging maingat po tayo lalo na po kapag hindi natin kilala ang ating mga nakakausap. Sana po ay hindi na po ito maulit pa at wala na pong iba pang mabiktima,” ani PBGen Villaflor.
