Palawan – Nagbalik-loob sa pamahalaan ang 61 na dating tagasuporta ng Communist Terrorist Group (CTG) sa Sitio Cacawitan, Barangay Tagusao, Quezon, Palawan nitong Lunes, ika-25 ng Setyembre 2023.
Ang mga ito ay nangako ng pakikipagtulungan sa pamahalaan at pagsuporta sa programa ng National Task Force to End Local Communist Armed Conflict (NTF-ELCAC) para sa pagkamit ng kapayapaan sa lalawigan.
Sa pangunguna ng Lokal na Pamahalaan ng Quezon, Marine Battalion Landing Team (MBLT-7), at Philippine National Police (PNP) ay pormal na tinanggap ang pagbabalik-loob ng grupo.
Ayon kay Mayor Joselito Ayala, abot kamay na ng mga mamamayan ang gobyerno at mga serbisyo nito kahit sa malalayong lugar upang maiwasan na ang pakikibaka laban sa pamahalaan.
Kaugnay nito, pinasasalamatan din ng Alkalde ang mga dating miyembro ng NPA sa kanilang inisyatibo para sumuporta sa programang pangkapayapaan ng pamahalaan.
Samantala, ang mga sumuko ay nakatanggap ng tulong mula sa Lokal na Pamahalaan para sa kanilang pangkabuhayan.
Panulat ni Patrolman Erwin Calaus
