Balon Bato, Quezon City — Arestado ang anim na suspek matapos maaktuhan ng mga operatiba ng Talipapa Police Station 3 ng QCPD na nagpo-pot session nito lamang Martes, Hunyo 14, 2022.
Kinilala ni Quezon City Police District Director, Police Brigadier General Remus Medina ang mga suspek na sina Jefferson Aguirre, 41; Alejo Delos Santos, 47; Ricardo Hipolito Jr., 31; Flordeliza Co, 50, pawang mga residente ng nasabing lugar; Daniel Jeremiah, 25, na residente naman ng Brgy. Marulas, Quezon City; at Dexter Bautista, 47, taga Brgy. 168, Caloocan City.
Ayon kay PBGen Medina, naaresto ang mga suspek sa Reading St., Teachers Bliss, Brgy. Balon Bato, Quezon City matapos makatanggap ng tawag mula sa isang concerned citizen hinggil sa di umano’y isang armadong lalaki.
Agarang rumesponde ang PS 3 kung saan positibong kinilala ang armadong lalaki na si Aguirre. Ngunit sa halip na sumuko sa kapulisan ay tumakbo ito papasok sa isang bahay na kung saan ay naaktuhan ang limang suspek habang nagpo-pot session dakong alas-6:00 ng gabi.
Nakumpiska mula sa mga suspek ang 20 gramo na umano’y shabu at nagkakahalaga ng Php136,000, isang revolver Caliber 38, anim na pirasong live ammunition, isang disposable na lighter, isang coin purse, at dalawang aluminum foil strips.
Mahaharap ang mga suspek sa kasong paglabag sa R.A. 9165 o Comprehensive Dangerous Drugs Act of 2002 habang karagdagang kaso na R.A. 10591 o Comprehensive Firearms and Ammunition Regulation Act ang isasampa pa kay Aguirre.
“Malugod kong binabati ang ating mga kapulisan sa kanilang pagsisikap upang mahuli ang mga suspek at masamsam ang mga ebidensya. Ang kanilang dedikasyon sa kanilang sinumpaang tungkulin ay siyang sanhi ng matagumpay na operasyon,” pagbati ni PBGen Medina.
Source: PIO QCPD SMART
###
Panulat ni PSSg Remelin Gargantos
