Parañaque City — Timbog ang anim na Chinese National at isang Pilipino sa ikinasang operasyon ng NCRPO matapos mapag-alaman na sila ay ilegal na nanggagamot at nagbebenta ng mga medisina na ginagamit para sa abortion nito lamang Lunes, Hunyo 19, 2023.
Ayon kay Regional Director, PMGen Edgar Alan O Okubo, sa ilang linggong pagmamatyag ng Regional Intelligence Division ng NCRPO ay nagsagawa sila ng isang planadong buy-bust operation sa Tambo, Parañaque City kung saan matagumpay na naaresto ang pitong akusado.
Ayon pa sa mga operatiba, isang confidential informant ang nagdulog sa kanilang ahensya patungkol sa di-umano’y ilegal na gawain sa nasabing lugar.
Bumili ng gamot na ginagamit pampalaglag ang asset ng kapulisan at nang makumpirma, agad pumasok ang mga operatiba at dinakip ang mga akusado.
Kabilang ang Php3,000 marked money, nasamsam rin mula sa mga suspek ang isang pakete ng Mifepristone Tablets 25mg, isang pakete ng Cefixime Dispersible Tablets 100mg, isang pakete ng Golden Throat Lozenge, at Metronidazole Tablets.
Sasampahan ang pitong akusado ng kasong illegal practice of medicine na nakapaloob sa Republic Act 2382 o Medical Act of 1959 at paglabag sa Food, Drug, and Cosmetic Act na kilala rin na Republic Act 3720.
“Ang tagumpay ng operasyong ito ay patunay ng hindi matatawaran ang pagkakaisa ng pamayanan at kapulisan laban sa lahat ng uri ng krimen sa pamayanan. Makakaasa ang ating mga kababayan na hindi titigil ang inyong kapulisan upang tiyaking ligtas at panatag ang ating pamayanan,” ani PMGen Okubo.
Source: PIO NCRPO
Panulat ni PSSg Remelin M Gargantos
