Pilar, Sorsogon – Nagsagawa ng Orientation at Oath-Taking para sa mga miyembro ng KKDAT ang 504th Maneuver Company, Regional Mobile Force Battalion 5 na ginanap sa Barangay Danlog, Pilar, Sorsogon nito lamang Oktubre 9, 2022.
Ang naturang aktibidad ay pinangunahan ni Police Major Renante N Arambuyong, Company Commander, sa ilalim ng pangangasiwa ni Police Lieutenant Colonel Jefferson B Araojo, Force Commander, RMFB5.
Ibinahagi sa mga miyembro at opisyales ng Sangguniang Kabataan ng nasabing barangay ang paksa ukol sa Terorismo at mapanlinlang na panghihikayat sa mga kabataan na sumapi sa New People’s Army o NPA.
Tinalakay din sa aktibidad ang mga kaalaman patungkol sa masasamang epekto ng ipinagbabawal na droga at kung paano ito maiiwasan. Naging tampok din sa nasabing aktibidad ang paghalal at panunumpa ng Kabataan Kontra Droga at Terorismo o KKDAT Officers, Barangay Danlog Chapter.
Ang PNP Bicol ay patuloy na magbibigay ng mga kaalaman alinsunod sa kampanya laban sa droga at terorismo para sa adhikaing malabanan at maiwasan ang kriminalidad at insurhensiya sa ating komunidad.
Source: Regional Mobile Force Battalion 5
Panulat ni PCpl Irene Honey Tria S Abad
