Bay, Laguna – Arestado ang limang suspek dahil sa paglabag sa liquor ban sa isinagawang operasyon ng Bay PNP nitong Linggo, May 8, 2022.
Kinilala ni Police Colonel Cecilio Ison Jr, Acting Provincial Director ng Laguna Police Provincial Office, ang mga suspek na sina Leon Aligato y Mercolita, 37; Ruel Talisay y Mercolita, 18; Randy Talisay, 40; Ramil Talisay, 40 and Agnes Aligato, 39, pawang mga residente ng Brgy. Dila, Bay, Laguna.
Ayon kay PCol Ison, bandang 7:00 ng gabi naaresto ang mga suspek sa Sitio Salang Bato, Brgy. Dila, Bay, Laguna ng mga operatiba ng Bay Municipal Police Station dahil sa isang reklamo ang natanggap mula sa isang biktima matapos saktan ng limang nag-iinuman na suspek.
Dagdag pa ni PCol Ison, nakumpiska sa limang suspek ang dalawang bukas na bote ng Emperador Light at Emperador Double Light at dalawang baso na ginamit na tagayan.
Ang mga suspek ay nahaharap sa kasong paglabag sa Omnibus Election Code in relation to Liquor Ban.
Pinaalalahanan ng PNP ang lahat na sumunod sa alituntunin at regulasyon ng Commission on Election na huwag gumawa at lumabag sa anumang probisyon ng batas.
Source: Laguna Police Provincial Office-PIO
###
Panulat ni Police Executive Master Sergeant Joe Peter Cabugon
