General Santos City – Swak sa selda ang limang magkasabwat kabilang ang isang babae makaraang maaktuhan na nasa pot session at nakuhanan ng aabot sa Php612,000 halaga ng shabu sa ikinasang entrapment operation ng mga awtoridad sa Purok 1, Clinan 5, Brgy. Mabuhay, General Santos City nito lamang gabi ng Martes, Setyembre 19, 2023.
Ayon kay Police Brigadier General Jimili Macaraeg, Regional Director ng Police Regional Office (PRO) 12, sasampahan ng kasong paglabag sa Comprehensive Dangerous Drugs Act of 2002 ang mga naarestong suspek na sina alyas “Tawing”, “Kroks”, “May”, “Dodong”, at alyas “Randy”.
Binigyang papuri naman ni PBGen Macaraeg ang mga operatiba ng General Santos City Drug Enforcement Unit, General Santos City Police Station 9 at 4, General Santos City Intelligence Unit dahil sa kanilang matagumpay na operasyon na naglalayong masawata ang kalakalan ng droga sa Rehiyong Dose.
Panulat ni Patrolman Khnerwin Jay A Medelin
