Timbog ng mga tauhan ng PNP Aviation Security Group (AVSEGROUP) ang isang 48-anyos a pasahero matapos magbiro na may lamang granada ang kanyang bag habang isinasakay ito sa overhead bin ng eroplano patungong Cebu dakong 1:30 ng hapon nito Lunes, Mayo 26, 2025 sa NAIA Terminal 3, Pasay City.
Ayon kay Police Brigadier General Christopher M Abecia, Director ng PNP AVSEGROUP, habang sumasakay ang nasabing pasahero sa isang commercial flight sa NAIA Terminal 3, bigla itong sinabi sa cabin crew na “may granada sa bag ko” habang ipinapwesto ang kanyang gamit sa overhead compartment.
Agad namang ipinagbigay-alam ng crew sa piloto ang pangyayari.
Kaagad namang tumugon ang airline management at airport security personnel.
Rumesponde ang mga pulis na may kasamang K9 unit upang inspeksyunin ang bag ng pasahero, subalit walang natagpuang anumang pampasabog o granada.
Nahaharap sa kasong paglabag sa Presidential Decree No. 1727, o ang “Anti-Bomb Joke Law”, na nagpapataw ng parusa sa sinumang magbabanggit o magbibiro ukol sa bomba o pampasabog sa mga pampublikong lugar gaya ng paliparan.
Ang insidente ay isang paalala sa publiko na seryoso at hindi dapat gawing biro ang usapin ng seguridad, lalo na sa mga lugar na maraming tao at may mahigpit na security protocol gaya ng mga paliparan.
