Camarines Sur — Himas rehas ang isang 41-anyos na lalaki matapos lumabag sa ipinatutupad na COMELEC gun ban ng pulisya sa Zone 5, Barangay Sagrada, Baao, Cam. Sur nito lamang Oktubre 28, 2023.
Kinilala ni Police Major Dennis Quindara, Hepe ng Baao MPS, ang naaresto sa alyas na “Jeffrey”, 41 at residente ng Barangay San Nicolas, Iriga City, Camarines Sur.
Ayon kay Police Major Quindara, isang concerned citizen ang tumawag sa himpilan ng Baao MPS na may namataang isang hindi kilalang lalaki na my dalang baril sa nasabing lugar at kaagad na rumesponde ang mga tauhan ng Baao PNP upang kumpirmahin ang nasabing ulat o impormasyon.
Naaktuhan ng pulisya si alyas “Jeffrey” na may dalang hindi lisensyadong baril, na 9mm ARMSCOR, may isang magazine at 6 na pirasong bala.
Sa kasalukuyan, ang suspek at ang nakumpiskang baril ay nasa pangangalaga ng Baao MPS habang inihahanda ang mga kasong paglabag sa RA 10591 at Violation of Section 261 (q) of BP Blg 881 as amended by Sec 32 RA 7166 in Relation to Comelec Resolution no. 10905 (Omnibus Election Code).
Patuloy ang panawagan ng PNP sa publiko na ganap na makipagtulungan sa ipinatutupad na election gun ban at iwasang magdala ng mga baril at anumang nakamamatay na armas dahil ang pulisya ay mananatiling nakatuon sa pagtiyak ng panuntunan ng batas para sa mas maayos at ligtas na Barangay at Sangguniang Kabataan Elections 2023.
Source: Baao MPS CSPPO
