Negros Occidental – Kulungan ang bagsak ng apat na lalake matapos silang maaresto sa buy-bust operation na isinagawa ng mga operatiba ng Himamaylan Component City Police Station-SDET sa Purok. 4, Brgy. Aguisan, Himamaylan City, Negros Occidental nitong ika-26 ng Pebrero 2023.
Kinilala ni Police Lieutenant Colonel Reynante Jomocan, Chief of Police ng Himamaylan Component City Police Station, ang mga naarestong suspek na sina Zaldy Jopillo Jr., 25; Henry Genegaban Jr., 42; Justin Gotera, 19; at si Arnie Gamosatan, 27, pare-parehong mga residente ng Brgy. Aguisan sa Himamaylan City, Negros Occidental.
Nakuha sa kanilang posesyon ang 7 piraso ng heat-sealed transparent plastic sachets na naglalaman ng hinihinalang shabu na may timbang na apat na gramo at may halagang Php27,000, Php500 na buy-bust money at ibang non-drug items.
Mahaharap sa kasong paglabag sa R.A. 9165 o Comprehensive Dangerous Drugs Act of 2002 ang apat na suspek.
Patuloy ang Himamaylan City PNP sa mga ganitong operasyon upang tuluyang matigil ang paglaganap at pagbebenta ng ilegal na droga sa kanilang nasasakupan.
