Arestado ang apat na indibidwal sa kasong paglabag sa Presidential Decree 1602 o “Illegal Gambling” sa Sitio Barberohan, Barangay Bus-Bus, Jolo, Sulu nito lamang ika-1 ng Abril 2024.
Kinilala ni Police Lieutenant Colonel Annidul M Sali, Chief of Police ng Jolo Municipal Police Station, ang mga suspek na sina “Mun”, 26; alyas “Adz”, 25; alyas “Naj”, 51; at alyas “Eri”, 44; na pawang mga residente ng naturang lugar.
Bandang 10:55 ng gabi ng nasabing petsa, habang ang mga awtoridad ng Jolo MPS ay nagsasagawa ng preventive mobile patrol katuwang ang 1404th-B, Regional Mobile Force Battalion 14-B sa naturang lugar nang makatanggap ng impormasyon mula sa isang concerned citizen tungkol sa ilegal na gawain sa nasabing lugar na nagresulta sa pagkaaresto sa apat na suspek.
Nakumpiska rin mula sa mga suspek ang isang set ng braha, isang piraso ng mangkok na puti, isang plato na kulay berde, dalawang piraso ng dice, isang piraso ng calton betting cover, Php4,893 na ginamit na pangpusta, at iba pang paraphernalia sa sugal.
Ang mga naarestong suspek ay mahaharap sa kasong paglabag sa PD 1602 o “Illegal Gambling” kapag napatunayang nagkasala ang mga ito.
Ang tagumpay ng PNP laban sa mga ilegal na sugal ay bunga ng pinaigting at aktibong pakikipagtulungan ng mamamayan para mapanatiling maayos at ligtas ang komunidad.
Panulat ni Pat Ma. Señora Agbuya
