Nasakote ng mga tauhan ng Pasay City Police Station ang apat na suspek sa gitna ng pagtatangkang dukutin ang biktimang businesswoman nito lamang Lunes, Enero 22, 2024.
Kinilala ni PBGen Mark Pespes, District Director ng Southern Police District, ang mga suspek na sina alyas “Joe”, 43; alyas “Jhing”, 27; alyas “John”, 25; at si alyas “Arn-arn”, 47.
Ayon sa ulat, nagsasagawa ng routine patrolling ang mga tauhan ng Substation 1, Pasay CPS sa kahabaan ng Roxas Boulevard nang mamataan ang kaguluhan.
Mabilis na kumilos at nahuli ang mga suspek sa gitna ng pagtatangkang dukutin ang biktimang si alyas “Dana”, isang 35-anyos, Chinese businesswoman na nasa loob ng puting BMW Sedan.
Nahuli ang mga suspek na sakay ng itim na Toyota Land Cruiser Prado, bandang 7:30 ng umaga sa kahabaan ng Roxas Boulevard, Brgy 6, Pasay City.
Sa naturang operasyon, malaki rin ang naging papel ng mga saksi na sina alyas Cong, 39; at alyas Jayver, 45, na barker/parking boy.
Narekober ng pulisya ang mga mahahalagang ebidensya mula sa mga suspek, kabilang ang isang revolver (paltik), limang live ammunition para sa cal. 38, tatlong nakabukas na maliit na sachet na naglalaman ng hinihinalang shabu, isang foil strip, dalawang kutsilyo na may scabbard, iba pang mga kontrabando: tatlong handheld radio, duct tape, at isang martilyo na natatakpan ng medyas.
Ang mga suspek ay mahaharap sa mga reklamong kidnapping, paglabag sa RA 10591 (Illegal Possession of Firearms), RA 9165 (Comprehensive Dangerous Drugs Act of 2002), at BP 6 (Illegal Possession of Bladed, Pointed or Blunt Weapon).
Pinuri ni PBGen Pespes ang mga tauhan ng Pasay CPS at ang pakikipagtulungan ng mga testigo na binibigyang-diin ang kanilang pangako sa pagtiyak ng kaligtasan at seguridad ng publiko.
Source: SPD PIO
Panulat ni PSSg Remelin M Gargantos
