Arestado ang apat na drug suspek sa ikinasang buy-bust operation ng mga operatiba ng Leyte PNP sa Barangay Cabalquinto, Calubian, Leyte nito lamang Hunyo 18, 2024.
Kinilala ni Police Colonel Dionisio DC Apas Jr., Officer-In-Charge ng Leyte Police Provincial Office, ang mga suspek na sina alyas “Fe”, 28; alyas “Elsa”, 42; alyas “Jason”, 41; at alyas “Neil”, 51; mga residente ng Barangay Cabalquinto, Calubian, Leyte.
Ayon kay PCol Apas, bandang 5:50 ng hapon nang ikasa ang operasyon ng pinagsanib pwersa ng mga tauhan ng Provincial Drug Enforcement Unit-Leyte Police Provincial Office, Calubian Municipal Police Station, Station Drug Enforcement Unit, Provincial Intelligence Unit-Leyte Police Provincial Office at 2nd Leyte Provincial Mobile Force Company.
Nakumpiska sa mga suspek ang 11 pakete ng hinihinalang shabu na may tinatayang timbang na isang kilo na nagkakahalaga ng Php6,800,000, isang yunit ng Caliber .38 revolver, cellphone at isang genuine 500-peso bill na buy-bust money.
Mahaharap ang mga suspek sa kasong paglabag sa Section 5, 6, 11 at 12 ng Article II ng Republic Act 9165 o Comprehensive Dangerous Drugs Act of 2002 at RA 10591 o Illegal Possession of Firearm.
Ang mga kapulisan ay patuloy sa pagpuksa sa mga gumagamit at nagbebenta ng ilegal na droga upang makausad ang ating bansa tungo sa Bagong Pilipinas.
Panulat ni Patrolwoman Marielle Dulnuan
