Iloilo – Nasakote ng mga operatiba ng Guimbal PNP ang isang 38-anyos na construction worker sa ikinasang buy-bust operation sa Brgy. Bagumbayan, Guimbal, Iloilo, nitong Biyernes bandang alas-5:00 ng hapon ng ika-22 ng Setyembre 2023.
Kinilala ni Police Captain Felice Dioso, Acting Chief of Police ng Guimbal Municipal Police Station, ang nahuling suspek na si alyas “Ryan”, tubong Brgy. Makatunao, Pandi Asukar, Concepcion, Iloilo, na pansamantalang naninirahan sa Guimbal.
Ayon kay PCpt Dioso, nakumpiska sa suspek ang sampung sachet ng pinaniniwalang shabu, kasama na ang halagang Php6,000 na ginamit bilang buy-bust money, at mga iba pang non-drug items.
Ayon pa kay PCpt Dioso, ang drogang nakumpiska ay tumitimbang ng 10 gramo na nagkakahala ng Php60,000.
Nahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002.
Hinihikayat ang mamamayan ng Guimbal na maging mapanuri at maging kaagapay sa mga hakbang ng kapulisan sa pagsugpo sa ilegal na droga at kriminalidad.
