Laguna – Naging matagumpay ang isang araw na Simultaneous Anti-Drug Operation ng Laguna PNP kung saan 36 na suspek ang naaresto nitong Huwebes, Mayo 19, 2022.
Ang pinaigting na kampanya ng Laguna Police Provincial Office sa pamumuno ni Police Colonel Cecilio Ison Jr, Provincial Director laban sa ilegal na droga ay nagresulta ng pagkaaresto ng tatlumpu’t anim na indibidwal kabilang ang isang High Value Individual at pagkakumpiska ng 19.21 gramo ng shabu na nagkakahalaga ng Php135,151 sa isinagawang operasyon sa probinsya ng Laguna.
Samantala, kinilala ni Police Colonel Ison Jr., ang naaresto na High Value Individual na si Marlon Timog y De Guzman, 49, na naaresto sa Sitio Lote, Brgy. Lecheria, Calamba City, Laguna sa buy-bust operation ng Calamba City Police Station bandang 8:01 ng gabi.
Ayon pa kay PCol Ison, nakumpiska sa suspek ang anim na piraso ng heat-sealed transparent plastic sachets na hinihinalang shabu; isang piraso na caliber .38 na walang serial number at anim na pirasong live ammunition.
Nahaharap si Timog sa kasong paglabag sa RA 9165 o Comprehensive Dangerous Drugs Act of 2002 at paglabag sa RA 10591 o Comprehensive Firearms and Ammunition Regulation Act in relation to Omnibus Election Code.
Binigyang-pugay naman ni PCol Ison ang malaking operational accomplishments ng kanyang nasasakupan upang mapanatili ang kapayapaan sa kanilang pamayanan.
###
Panulat ni PEMS Joe Peter Cabugon/RPCADU 4A
