Tuguegarao City, Cagayan – Arestado ang 32 na indibidwal sa isinagawang Anti-Illegal Gambling Operation ng Tuguegarao City Police Station sa Brgy. Centro 7, Tuguegarao City, Cagayan nitong Linggo, Oktubre 2, 2022.
Ayon kay Police Lieutenant Colonel Richard R Gatan, Hepe ng Tuguegarao PNP, hinuli ang mga suspek matapos mahuli sa akto ng mga pulis na tumataya sa larong billiard.
Nakumpiska mula sa mga suspek ang dalawang pirasong billiard stick, 11 pirasong billiard balls at pera na nagkakahalaga ng Php16,040 sa iba’t ibang denominasyon na siyang ginamit sa sugal.
Nahaharap ang mga suspek sa kasong paglabag sa Presidential Decree 1602 o ang batas laban sa Illegal Gambling.
Sinabi naman ni PLtCol Gatan, na mas lalo pa nilang papaigtingin ang kanilang kampanya laban sa Ilegal na pagsusugal upang masugpo ang krimen na ito sa kanilang nasasakupan.
Samantala, pinuri naman ni Police Colonel Julio S Gorospe, Provincial Director ng Cagayan Police Provincial Office ang buong hanay ng Tuguegarao PNP sa matagumpay na pagkakahuli sa mga suspek. Hinikayat din niya ang mamamayan na patuloy na makipagtulungan sa kapulisan at huwag matakot na magsumbong sa mga krimen sa kanilang komunidad para makamit ang isang payapa at progresibong Cagayan.
Source: Tuguegarao City Police Station
Panulat ni Police Staff Sergeant Mary Joy D Reyes
