Isinagawa ng mga kapulisan ng Mandaue City Police Office ang Community Outreach Activity bilang pakikiisa sa pagdiriwang ng 31st National Children’s Month na ginanap sa New Jagobiao Gym, Jagobiao, Mandaue City, Cebu, Huwebes, Nobyembre 23, 2023.
Sa programa na pinangunahan ng butihing City Director ng MCPO, PCol Maribel Getigan, tampok sa aktibidad ang mga serbisyong hatid ng kapulisan gaya ng libreng medical at dental consultation, libreng gupit, pamamahagi ng food packs, hygiene kits, tsinelas, at mga laruan sa mga bata na siyang mga naging pangunahing kalahok.
Karagdagang tuwa at saya naman ang handog ng mga clown at mascot na nakiisa at nanguna sa mga larong inihanda para sa mga bata.
Personal naman na pinaunlakan ang makabuluhang aktibidad ng naging panauhing pandangal at tagapagsalita ng programa, Hon. Camilo S Basaca, Department Head ng City Social Welfare Services, mga pinuno at kinatawan ng kapulisan ng lungsod, City Health Office, Mandaue Investment Promotions Tourism Action Center, Mandaue City Cultural Dance Troupe, Advocacy Support Groups at Barangay Officials.
Alinsunod sa tema ng selebrasyon: “Healthy, Nourished, Sheltered: Ensuring the Right to Life for all”, hinimok ng mga naging tagapagsalita ng programa ang patuloy na pakikiisa ng komunidad sa mga programa ng pamahalaan na nakatuon sa pagsusulong ng kabutihan at kapakanan ng mga kabataan at ng susunod na henerasyon.
