Arestado ang isang 31 anyos na lalaki matapos nitong aksidenteng makalabit ang baril at tinamaan ng bala ang paa ng isang 11 anyos sa Barangay Poblacion, Pikit, Cotabato nito lamang Nobyembre 28, 2024.
Kinilala ni Police Lieutenant Colonel Romeo M Calamba, Officer-In-Charge ng Pikit Municipal Police Station, ang naarestong suspek na si alyas “Kiram”, 31 anyos, walang asawa at residente ng Poblacion 7, Midsayap, Cotabato.
Habang ang biktima ay kinilalang si alyas “Nas”, residente ng nasabing barangay.
Sa ulat ng Pikit Municipal Police Station, habang nagpapatrolya ay nakarinig ito ng malakas na pagputok kaya’t agad silang nagtungo sa pinangyarihan at dinatnan ang biktima na may dugo sa bahagi ng paa nito kaya’t agad itong dinala sa pinakamalapit na pagamutan.
Samantala, narekober sa pinangyarihan ng insidente ang isang basyo ng bala at nakumpiska mula sa pag-iingat ng suspek ang isang yunit ng Cal. 45 na baril na kargado ng magasin at isang bala.
Nabigo ang suspek na magpakita ng kaukulang dokumento para sa kanyang baril kaya’t agad itong inaresto at binasahan ng karapatan.
Patuloy ang pagpapatrolya ng Pikit PNP upang mapanatili ang katahimikan at kaayusan, layunin na masigurong ligtas ang mga mamamayan sa anumang krimen.
