Arestado ang nasa 30 indibidwal sa isinagawang operasyon ng Police Regional Office 10 sa isinagawang anti-drug operation mula Marso 7-9, 2025 sa iba’t ibang parte ng Northern Mindanao.
May kabuuang 25 operasyon ang isinagawa ng PRO 10, na nagresulta sa pagkakakumpiska ng 312.485 gramo ng shabu, na may tinatayang Standard Drug Price na Php2,124,898.
Kabilang sa mga naaresto ang mag-ama na kinilalang si alyas “Ogis”, 40 anyos, at “JR”, 18 anyos, naaresto ng mga tauhan ng Tagoloan Municipal Police Station sa isinagawang buy-bust operation sa Zone 3, Baluarte, Tagoloan, Misamis Oriental noong Marso 7, 2025.
Nakumpiska sa operasyon ang 150 gramo ng shabu na nagkakahalaga ng Php1,020,000.
Isa pang buy-bust operation ng mga operatiba ng Kalilangan MPS ang pagkakaaresto sa dalawang drug suspect noong Marso 7, 2025, sa Central Poblacion, Kalilangan, Bukidnon. Nakumpiska ang 56 gramo na shabu na nagkakahalaga ng Php384,200.
Pinuri ni Police Brigadier General Jayden C De Guzman, Regional Director, ng PRO 10, ang hindi natitinag na dedikasyon ng Northern Mindanao PNP at patuloy na papalakasin ang kampanya laban sa iligal na droga, kriminalidad, at terorismo.
