Arestado ang tatlong miyembro ng Sub-Regional Committee 3, Guerilla Front 53 ng Southern Regional Mindanao Committee, Communist Party of the Philippines, New People’s Army sa patong-patong na kaso sa Mabini Street, Barangay Bagua 3, Cotabato City nito lamang ika-16 ng Nobyembre 2024.
Kinilala ni Police Brigadier General Romeo Juan Macapaz, Regional Director ng Police Regional Office Bangsamoro Autonomous Region, ang mga naarestong suspek na sina alyas “Ka David”, 57 anyos, alyas “Dewin”, 48 anyos, pawang residente ng Davao City, at alyas “Mae”, 28 anyos, residente ng Santa Cruz, Davao del Sur.
Ayon kay PBGen Macapaz, naging matagumpay ang ikinasang operasyon ng mga tauhan ng Cotabato City Police Office katuwang ang Armed Forces of the Philippines, Philippine Marines, at Public Safety Office na nagresulta sa pagkakaaresto sa mga suspek sa bisa ng Warrant of Arrest sa kasong paglabag sa Genocide, Attempted Murder, Arson, Firearms Ammunition, International Humanitarian Law, at Frustrated Murder.
Sinasabing si alyas “Ka David” ay nanilbihan bilang secretary at 12 taon ng aktibo sa organisasyon habang 10 taon ding Political Officer ang asawa nitong si alyas “Dewin” at Medical Team naman ng mga ito si alyas “Mae” sa loob ng pitong taon.
Patuloy na magsagawa ng mga operasyon ang PRO BAR, sa patnubay ng pamahalaan, upang hulihin ang mga lumalabag sa batas, mabawasan ang ilegal na gawain, at isulong ang kaligtasan, kaayusan, at kapayapaan tungo sa progresibong Bagong Pilipinas.
Panulat ni Patrolwoman Ma. Señora Agbuya
