Tiaong, Quezon – Arestado ang tatlong miyembro ng Manalo-Briones Gun-For-Hire Group sa isinagawang Oplan Paglalansag Omega at Oplan Salikop ng CALABARZON PNP at Criminal Investigation and Detection Group (CIDG).
Mga baril, bala, magazine at granada nakumpiska sa Sitio Sulukan Brgy. Anastacia, Tiaong, Quezon nito lamang Huwebes, Hulyo 28, 2022.
Kinilala ni Police Colonel Marlon Santos, Regional Chief ng CIDG 4A, ang nahuling mga suspek na sina Ritzelda Herrera y Reyes, 50, John Gilbert Herrera y Reyes- 30 at Von Vincent Herrera y Reyes- 22 habang pinaghahanap naman si Vicente Herrera y Allermo,52 pawang mga miyembro ng Mariano-Briones Gun-For-Hire Group.
Ayon kay PCol Santos, bandang 11:45 ng umaga naaresto ang mga suspek sa naturang lugar ng pinagsanib na pwersa ng Criminal Investigation and Detection Group-Regional Force Unit 4A, 401st at 405th Company ng Regional Mobile Force Battalion 4A, Quezon Police Provincial Office at Tiaong Municipal Police Station.
Narekober sa mga suspek ang tatlong hand grenade na walang safety pin, tatlong 12-gauge Shotgun, isang US Carbine, isang Caliber .9 HYDRA (US made), isang Caliber .45 pistol TM M1911A1, isang Caliber .45 pistol TM STI International, isang Caliber .45 pistol TM Norinco, isang Caliber .22 Magnum TM Smith and Wesson, isang Caliber .38 revolver TM Smith and Wesson, isang unit Caliber 45 Thompson submachine gun, apat na unit Caliber .38 revolver, 37 steel magazines ng ibat-ibang klase ng baril at 52 fired cartridges.
Nahaharap ang mga suspek sa kasong Republic Act 10591 o Illegal Possession of Firearms and Ammunition at Republic Act 9516 o Act of Illegal/Unlawful Possession, Manufacture, Dealing in, Acquisition or Disposition of Firearms, Ammunition or Explosives.
Ang tagumpay ng PNP laban sa mga may sala sa batas ay bunga ng pinaigting na suporta at pakikipagtulungan ng mamamayan upang mapanatiling tahimik, ligtas at mapayapa ang komunidad.
Panulat ni Police Executive Master Sergeant Joe Peter V Cabugon
