Sta. Teresita, Cagayan – Nasamsam ang tatlong matataas na kalibre ng baril at granada ng Communist Terrorist Group sa isinagawang operasyon ng Cagayan PNP at AFP sa Sitio Bigoc, Brgy. Alucao, Sta. Teresita, Cagayan nito lamang Huwebes, ika-14 ng Hulyo 2022.
Ayon kay Police Colonel Renell R Sabaldica, Provincial Director ng Cagayan Police Provincial Office, bandang 6:00 ng umaga ay tinungo ng pinagsamang pwersa ng 2nd Cagayan Provincial Mobile Force Company, Sta. Teresita Police Station, 501st Brigade ang bulubunduking bahagi ng Sitio Bigoc at matagumpay na narekober ang mga kontrabando.
Nakuha ng PNP at AFP ang dalawang M16 rifle, isang M14 rifle, apat na long magazine para sa M16, apat na short magazine ng M16, isang magazine ng M14, at 11 improvised hand grenade.
Samantala, pinasalamatan naman ni PD Sabaldica ang dating rebelde na nagbigay ng impormasyon sa kinaroroonan ng mga kontrabandong itinago ng mga miyembro ng Communist Terrorist Group.
Aniya, malaking tulong ang pagkakarekober ng mga gamit pandigma ng mga teroristang grupo sa paghina ng kanilang hanay sa buong rehiyon.
Source: Sta. Teresita Police Station
###
