Occidental Mindoro – Kalaboso ang sinapit ng tatlong individual matapos ang isinagawang Anti-Illegal Drugs Operations (buy-bust) sa pangunguna ng PDEA Occidental Mindoro katuwang ang Municipal Drug Enforcement Unit ng San Jose Municipal Police Station sa Purok Kapit Bisig, Brgy. Poblacion 4, San Jose Occidental Mindoro noong ika-23 ng Setyembre 2023.
Kinilala ni Police Lieutenant Colonel Michael Donald Carnoso, Acting Chief of Police ng San Jose MPS, ang mga akusado na sina alyas “Jonjon”, 42, residente ng San Jose, Occidental Mindoro; alyas “Alfredo”, 34, residente ng Sablayan, Occidental Mindoro; at alyas “Roi”, 28, na residente ng San Jose, Occidental Mindoro.
Ayon kay PLtCol Carnoso, ang mga nasabing suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002 matapos mabilhan si alyas “Jonjon” ng isang nagpanggap na poseur buyer ng hinihinalang ilegal na droga na tinatayang may timbang na 0.0196 grams kapalit ang Php1,000.
Narekober rin mula sa mga suspek ang pera na ginamit bilang buy-bust money, iba’t ibang uri ng drug paraphernalia, cellphone at motor na gamit sa pakikipagtransaksyon, at anim pang plastic sachet ng hinihinalang shabu na may timbang na humigit kumulang 7.3 gramo at nagkakahalaga ng Php43,000.
Ang tagumpay ng operasyon ay resulta ng serbisyong nagkakaisa, magandang ugnayan, at pagmamalasakit ng mamamayan at kapulisan sa komunidad at sa direktiba ni Police Colonel Jun Dexter Danao, Provincial Director ng Occidental Mindoro Police Provincial Office, na lalo pang paigtingin ang pagpuksa sa ilegal na droga sa lalawigan ng Occidental Mindoro para sa kaayusan at kapayapaan tungo sa kaunlaran ng bansa.
Panulat ni Patrolman Erwin Calaus
