Arestado ng mga awtoridad ang tatlong (3) indibidwal sa kasong illegal liquified petroleum gas (LPG) refilling activities sa Barangay Longos, Calumpit, Bulacan noong Mayo 7, 2025.
Kinilala ni Police Major General Nicolas Torre III, Director ng Criminal Investigation and Detection Group, ang tatlong suspek na sina alyas “Regie”, “Rowel” at “Glenn”.
Ayon kay PMGen Torre III, nahuli ang mga suspek na nagsasagawa ng refilling at repainting ng LPG cylinders ng wala umanong authorization sa naturang kompanya.
Ang nasabing operasyon ay matagumpay na isinagawa ng pinagsanib pwersa ng Regional Special Operations Team (RSOT) ng CIDG Regional Field Unit 3 at CIDG Bulacan Provincial Field Unit sa bisa ng search warrant sa kasong paglabag ng Republic Act 623 na inamiyendahan ng Republic Act 5700 or “An Act to Regulate the Use of Duly Stamped or Marked Bottles, Boxes, Casks, Kegs, Barrels and Other Similar Containers” laban sa GASFLO LPG Distributor Corporation.
Nakumpiska ng mga awtoridad ang nasa Php6.3 Milyong halaga ng pera na siyang magsisilbing ebidensya ng naturang ilegal na aktibidad, kabilang na ang mga LPG cylinders, isang refilling machine, isang storage tank, isang truck, at iba pang mga refilling equipment.
Bahagi ang naturang operasyon sa mas pinaigting na kampanya ng Pambansang Pulisya sa pamumuno ni PGen Rommel Francisco D Marbil, PNP Chief, laban sa lahat ng mga ilegal na aktibidad sa bansa upang tiyakin ang kaligtasan at kaayusan ng bawat mamamayan saan mang sulok ng bansa.
