South Cotabato – Arestado ng mga tauhan ng Surallah Municipal Police Station ang tatlong drug suspects sa pagpapatupad ng Search Warrant laban sa mga ito sa Brgy. Libertad, Surallah, South Cotabato noong Agosto 3, 2023.
Ayon kay Police Lieutenant Colonel Joel Fuerte, Hepe ng Surallah MPS, puntirya ng Search Warrant sina alyas “Bokyo”, 40; alyas “Kirby”, 22; alyas “Mica”, 41, na pawang residente ng nasabing lugar na kung saan nakumpiska mula sa kanila ang mga bukas at selyadong plastic na naglalaman ng hinihinalang shabu, at mga drug paraphernalia.
Samantala, umabot naman sa kabuuang 1.5 gramo ng shabu na may tinatayang halaga na Php10,200 ang nasabat sa mga naarestong suspek.
Ayon pa sa ulat, kilalang sangkot sa ilegal na droga ang mga suspek sa nasabing lugar na siyang naging dahilan ng aplikasyon para sa naturang search warrant.
Tinitiyak naman ng Surallah PNP sa publiko na patuloy ang kanilang Anti-Illegal Drugs Operation sa pagsugpo sa ilegal na droga sa kanilang nasasakupan tungo sa mas ligtas at maayos na pamayanan.
Panulat ni Patrolman Khnerwin Jay A Medelin
