Occidental Mindoro – Boluntaryong sumuko ang tatlong miyembro ng New People’s Army (NPA) sa mga tauhan ng Occidental Mindoro PNP sa Barangay Payompon, bayan ng Mamburao noong Biyernes, Mayo 5, 2022.
Kinilala ni Police Colonel Simeon Gane Jr, Provincial Director ng Occidental Mindoro Police Provincial Office ang mga nasabing sumuko na sina alyas “Ka Joshua”, 42; “Ka Jerome”, 42; at “Ka Marian”, 41, mula sa Barangay Barahan, Sta. Cruz, ng nasabing lalawigan.
Ayon kay PCol Gane Jr, ang pagsuko ng tatlong rebeldeng NPA ay resulta ng walang humpay na pagsisikap ng 2nd Provincial Mobile Force Company, Provincial Intelligence Unit, at Sta Cruz Municipal Police Station ng Occidental Mindoro PPO, kasama ang 402nd at 405th Maneuver Company ng Regional Mobile Force Battalion 4B, Provincial Intelligence Team-Occidental Mindoro ng Regional Intelligence Unit-4B, at ng 76th Infantry Battalion sa ilalim ng 203rd Brigade ng Philippine Army.
Ayon pa kay PCol Gane Jr, ang mga sumukong CTG ay mga regular na miyembro ng Sandatahang Yunit sa Pag-oorganisa sa ilalim ng Platoon GMT, SRMA-4D (ISLACOM MINDORO) na nag-ooperate sa mga lalawigan ng Occidental Mindoro (Sta Cruz, Mamburao, Paluan, at Abra de Ilog) at Oriental Mindoro (Puerto Galera, San Teodoro at Baco).
Dagdag pa ni PCol Gane Jr, ang mga nasabing CTG ay nasa kustodiya na ngayon ng Occidental Mindoro 2nd PMFC para sa debriefing at pagtukoy kung ang mga nasabing dating rebelde ay kwalipikado para sa Enhanced Comprehensive Local Integration Program (ECLIP).
Samantala, pinuri naman ni Police Brigadier General Sidney Sultan Hernia, Regional Director ng PRO MIMAROPA ang Occidental Mindoro PPO para sa matagumpay na pagsuko ng mga dating rebelde.
Ito ang direktang resulta ng matibay na pangako, sa ilalim ng NTF ELCAC (National Task Force to End Local Communist Armed Conflict), sa pag-secure ng ating rehiyon laban sa banta ng komunistang terorista.
Source: RPIO MIMAROPA
Panulat ni Patrolman Erwin Calaus
