Quezon City — Arestado ang tatlong binatilyo matapos masangkot sa isang Robbery (Hold-Up) incident na nag-viral sa Facebook sa isinagawang follow-up operation ng Pasong Putik Police Station (PS 16) nito lamang Linggo, Abril 2, 2023.
Kinilala ni PBGen Nicolas Torre lll, District Director ng Quezon City Police District, ang mga suspek sa pangalang Patrick Alwin, 23; Blasel Ben, 22; at Jhonric, 24, pawang mga residente ng Caloocan City.
Ayon kay PBGen Torre lll, nangyari ang pagnanakaw dakong 8:00 ng gabi ng Abril 1, 2023 kung saan ang mga biktima ay kinilalang sina Sara Mae at Rhooell.
Ayon sa kanilang ulat, naglalakad umano sila sa Neopolitan Belfast Avenue, malapit sa SM Fairview, Brgy. Pasong Putik Proper, Novaliches, Quezon City kung saan tatlong (3) lalaki na sakay ng isang motorsiklo ang pansamantalang huminto at ang isa sa kanila ay bumaba na armado ng patalim at nilapitan ang biktima na si Abendan at nagdeklara nang holdap at kinuha ang mga personal na gamit ng biktima. Habang tumatakas ang mga suspek gamit ang kanilang getaway motorcycle, tinutukan din ng suspek na si Santos ng kutsilyo ang biktimang si Menor.
Sa sandaling ito, isang vlogger ang nagkataong dumaan at kinuhanan ng video ang mga tumatakas na suspek. Ipinost ng vlogger ang video sa Facebook na naging viral na nakatulong at naging dahilan upang malaman ng mga operatiba ang lokasyon ng mga suspek.
Nagsimula ang hot pursuit at follow-up operation ng mga operatiba ng PS 16 na nagresulta sa pagkakaaresto sa mga suspek at boluntaryong sumuko bandang 1:30 tanghali ng Abril 2, 2023 sa Camarin Police Sub-Station 10, Caloocan City Police Station.
Narekober mula sa mga suspek ang isang (1) bladed na armas at isang (1) unit na pulang Rusi na motorsiklo.
Mahaharap sa kasong Robbery ang mga suspek.
“Nagpapasalamat ako sa ating mga kababayan sa pagmamalasakit sa kanilang kapwa dahilan ng pagkaaresto ng mga suspek. Dito rin naipakita ang tulong ng vlogging sa positibong paraan dahil nakatulong ito sa mga pulis para agad na marespodehan ang mga ganitong pangyayari at lubos na mapanatili ang kapayapaan sa lungsod Quezon,” ani PBGen Torre lll.
Source: QCPD PIO
Panulat ni PSSg Remelin M Gargantos
