Arestado sa ikinasang entrapment operation ng mga miyembro ng Southern Police District Special Operations Unit ang tatlong suspek na sangkot sa ilegal na pagbebenta ng mga baril sa kahabaan ng Acacia St., Cembo, Taguig City nito lamang Martes, Hulyo 2, 2024.
Kinilala ni Police Brigadier General Leon Victor Z Rosete, District Director ng SPD, ang mga nadakip na suspek na sina alyas “Bobby LEWIS”, 28 anyos, alyas “John”, 34 anyos, at alyas “Gary”, 34 anyos, napag-alaman na isang pulis.
Ang operasyon ay humantong sa pagkumpiska ng dalawang pirasong Php1,000 bill na ginamit bilang marked money, isang Rifle Defense M16 First SAMCO Modified Color na may serial number na RP122190 na puno ng 30 live ammunition, isang Glock 17 Gen 4 na may serial number AFP058637 na may logo ng AFP na may kargang 17 live ammunition, isang Arms Moravia Czech Republic na may serial number 613319 na may kargang 10 live ammunition, isang tennis bag, isang Yamaha NMAX motorcycle na walang plate number, tatlong mobile phone ng mga naarestong suspek, at isang PNP Identification Card.
Kasong paglabag sa Republic Act 10591 o Comprehensive Firearms and Ammunition Regulation Act ang kakaharapin ng mga suspek.
Ang matagumpay na operasyon ng SPD ay resulta sa mas pinaigting na kampanya kontra loose firearms na naaayon sa programa ni Pangulong Ferdinand Marcos Jr., na puksain ang anumang uri ng kriminalidad sa bansa upang makamit ang isang ligtas at mapayapang Bagong Pilipinas.
Source: SPD PNP
Panulat ni PSSg Remelin M Gargantos
