Arestado ng mga tauhan ng Sub-Station 5 ng Malabon City Police Station ang isang lalaking lumabag sa COMELEC gun ban sa Malabon City nito lamang Lunes, Pebrero 10, 2025.
Ayon kay Police Colonel Josefino Ligan, Acting District Director ng Northern Police District, nadakip ang isang 29-anyos na lalaki na residente ng Malabon City dahil sa sumbong ng isang concerned citizen sa mga awtoridad tungkol sa pagbabanta ng isang indibidwal gamit ang baril sa kahabaan ng P. Aquino St. corner Pinagsabugan St., Barangay Longos, Malabon.
Agad na rumesponde ang mga miyembro ng Special Weapon and Tactics (SWAT) at mga tauhan ng Tactical Motorized Response Unit (TMRU) na nagresulta sa pagkakadakip sa suspek.
Nakumpiska ng pulisya ang isang .45 caliber Llama Fabrinor Legutiano (España) pistol na may tampered serial number at isang loaded magazine na naglalaman ng pitong live round.
Nabigo ang suspek na magpakita ng mga legal na dokumento para sa baril, kabilang ang isang Commission on Elections (COMELEC) exemption, na bumubuo ng isang paglabag sa election gun ban.
Mahaharap siya sa kasong Grave Threats at paglabag sa Republic Act 10591 o “Comprehensive Firearms and Ammunition Regulation Act” in relation to Batas Pambansa Bilang 881 (Omnibus Election Code).
“Ang operasyong ito ay nagpapakita ng aming hindi natitinag na pangako sa kaligtasan ng publiko at pagpapanatili ng kapayapaan at kaayusan, lalo na sa panahon ng halalan,” pahayag ni PCol Ligan.
Source: NPD PIO
