Tinglayan Kalinga – Tinatayang Php28,500,000 halaga ng marijuana ang binunot at sinunog sa isinagawang marijuana eradication ng mga awtoridad sa Sito Balay, Tulgao West at Brgy. Loccong, Tinglayan, Kalinga nitong Agosto 17-18, 2022.
Ayon kay Police Colonel Peter Tagtag Jr., Acting Provincial Director ng Kalinga Police Provincial Office, ang dalawang araw na operasyon ay ipinatupad sa ilalim ng Oplan Summit 2022 ng pinagsanib na pwersa ng operatiba ng Tinglayan Municipal Police Station, PNP Drug Enforcement Group-Special Operation Unit 1, 1501st at 1503rd Regional Mobile Force Battalion, 1st Kalinga Provincial Mobile Force Company, Naval Force, Northern Luzon at Philippine Drug Enforcement Agency (PDEA).
Nagresulta ang operasyon sa pagkadiskubre sa limang plantasyon ng marijuana sa nabanggit na mga lugar na sumasaklaw sa lawak na 14,250 metro kuwadrado na may higit kumulang 142,500 piraso ng fully grown marijuana plants na nagkakahalaga ng Php28,500,000 batay sa halagang itinakda ng Dangerous Drug Board
Ang mga nadiskubreng marijuana ay agad binunot at sinunog sa mismong lugar na pinagtaniman nito.
Ayon pa kay Police Colonel Tagtag Jr., walang nahuling cultivator subalit patuloy ang imbestigasyon ng Pambansang Pulisya upang matukoy at mahuli ang mga nagtanim sa ipinagbabawal na halaman. at mas lalong papaigtingin ng mga awtoridad ang pagpuksa sa mga ilegal na halaman at droga sa kanilang nasasakupan.
###
