Matapos ang anim na buwan, matagumpay na nagtapos ng Public Safety Field Training Program (PSFTP) ang 225 na miyembro ng PNP-PRO2 Class SAMBISIG nito lamang Biyernes, ika-21 ng Oktubre taong kasalukuyan sa Camp Marcelo A Adduru, Tuguegarao City, Cagayan.
Sa ginanap na seremonya, naging Guest of Honor and Speaker si Police Brigadier General Steve Ludan, Regional Director, Police Regional Office 2, na kinatawan ni Police Brigadier General Romaldo Bayting, Deputy Regional Director for Administration.
Sa aktibidad, binasa ni PBGen Bayting ang mensahe ni PBGen Ludan, binigyang diin nito ang Badge of Honor kasabay ng kanilang pagtatapos ng PSFTP ay hudyat sa kanila upang paghandaan ang mga matitinding hamon at responsibilidad bilang mga bagong alagad ng batas.
“Huwag ninyong kalimutan na ang badge na isasabit sa inyong mga uniporme ay simbolo ng inyong katapatan at dedikasyon sa inyong trabaho. Hinihimok ko ang bawat isa sa inyo na ang mga natutunan ninyo sa loob ng 2,400 oras sa loob at labas ng Regional Training Center ay gamitin ng tama, may disiplina at integridad upang lalo pang mapagbuti,” saad ni PBGen Ludan.
Samantala, ang Class SAMBISIG ay nakatakdang sasailalim sa Basic Internal Security Operations Course (BISOC) sa darating na buwan ng Nobyembre, isang Specialized Training para sa mga nagtapos ng Mandatory Basic Recruit Course.
Source: RPIO PRO2
Panulat ni Patrolwoman Juliet Dayag
