Bacacay, Albay – Labis ang panlulumo at paghihinagpis ng pamilya ng isang 22 anyos na graduating student matapos matagpuan itong wala ng buhay at pinaghihinalaan pang ginahasa sa bayan ng Bacacay, Albay nito lamang Linggo, Hunyo 5, 2022.
Kinilala ni Police Major Irvin Bellen, Officer-in-Charge ng Bacacay Municipal Police Station ang biktima na si Rhea Bejerano Boneo, 22, scholar, working student at graduating student sa kursong Bachelor of Science in Accountancy, running for Cum Laude, residente ng Barangay Hindi, Bacacay, Albay.
Ayon kay PMaj Bellen, lumabas lamang ang biktima bandang 5:00 ng hapon upang kunin ang Php500 na perang ipinadala sa kanya ng kapatid.
Ayon pa kay PMaj Bellen, hindi na nakabalik ang biktima hanggang sa natagpuan ang duguan nitong katawan na may saksak, punit-punit ang damit na pang-ibaba at wala ng buhay.
Dagdag pa ni PMaj Bellen, “yung iskinita na papasok sa bahay ng biktima ay talagang madilim at masukal at ang sabi ng kapitan, ilang beses na rin daw doon may mga nangyaring attempted rape, pero nakakatakas, nanlalaban at nakakapalag yung mga biktima”.
Panggagahasa ang nakikitang motibo at may Person of Interest ng iniimbestigahan ang PNP na posibleng gumawa ng krimen.
Source: Bacacay Municipal Police Station, Albay PPO
###
Panulat ni Patrolman Rodel Grecia
