Arestado ang isang 21-anyos na lalaki sa isinagawang anti-drug operation ng mga awtoridad sa Sitio Baribag, Barangay Bibincahan, Sorsogon City, Sorsogon nitong Hunyo 3, 2025 bandang alas-11:20 ng umaga.
Ayon kay Police Brigadier General Andre P. Dizon, Regional Director ng Police Regional Office 5, ang operasyon ay resulta ng koordinadong pagsisikap ng mga operatiba mula sa National Special Unit Enforcement Team–Luzon 2 at ng Philippine Drug Enforcement Agency (PDEA) – Sorsogon Provincial Office.
Katuwang sa nasabing operasyon ang Sorsogon City Police Station, Provincial Drug Enforcement Unit (PDEU), 1st Provincial Mobile Force Company, at PDEG Special Operations Unit 5 – Team 2.
Kinilala ni PBGen Dizon ang suspek na si alyas “Jeff,” isang residente ng Barangay Jaboyo-an, Aroroy, Masbate. Siya ay inaresto matapos mahuli sa akto ng pagbebenta ng ipinagbabawal na gamot mula sa isang undercover agent.
Nasamsam mula sa suspek ang apat (4) na plastic sachet na naglalaman ng hinihinalang shabu na may kabuuang timbang na humigit-kumulang 300 gramo at may Standard Drug Price na Php2,040,000, isang (1) tunay na Php1,000 na ginamit bilang marked money, at ilang pekeng pera, pati na rin ang iba’t ibang personal na gamit.
Nagpaabot naman ng papuri si PBGen Dizon sa mga yunit na nagsagawa ng operasyon. Aniya, “Ang matagumpay na operasyon ay nagpapakita ng patuloy na determinasyon ng kapulisan at mga kaagapay nitong ahensya sa pagsugpo sa iligal na droga sa rehiyon”.
“Hindi kami titigil hangga’t hindi natin napuputol ang mga sindikatong nagpapakalat ng droga. Ang seguridad ng bawat komunidad ay aming pangunahing layunin,” pahayag ni PBGen Dizon.
Source: PNP Kasurog Bicol Facebook page
Panulat ni PSSg Mercolito P Lovendino Jr
