Narekober ng Philippine National Police (PNP) sa Region 1 ang kabuuang 207 baril noong Pebrero 2026 bilang bahagi ng pinaigting na kampanya laban sa loose firearms.
Sa loob ng nasabing buwan, nagsagawa ang mga operatiba ng 33 magkakahiwalay na operasyon na nagresulta sa pagkakaaresto ng 38 indibidwal na sangkot sa iligal na pag-iingat at paghawak ng baril. Sa mga operasyong ito, 33 baril ang nasamsam habang 10 pa ang karagdagang narekober sa iba pang operasyon ng pulisya.
Malaki rin ang naging papel ng pakikiisa ng komunidad sa nasabing kampanya. Boluntaryong isinuko ng mga residente ang 142 baril, habang 22 pa ang idineposito sa mga istasyon ng pulisya para sa safekeeping—patunay ng lumalakas na tiwala ng publiko sa kapulisan sa pagpapanatili ng kapayapaan at kaayusan.
Ayon kay PGen Jose Melencio C. Nartatez Jr., hepe ng PNP, bawat baril na natatanggal sa lansangan ay malaking hakbang upang maging mas ligtas ang mga pamayanan. “Ang tagumpay na ito ay nagpapakita na determinado tayo sa paglaban sa ilegal na armas. Bawat baril na maaalis sa kalye, mas ligtas ang ating mga komunidad. Hindi tayo titigil—patuloy nating palalakasin ang operasyon para protektahan ang mamamayan,” aniya.
Ang mga operasyon ay bahagi ng PNP Focused Agenda na umaayon sa direktiba ni Pangulong Ferdinand R. Marcos Jr. na palakasin ang mga hakbang para sa pampublikong seguridad, alinsunod sa layunin ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
