Tuguegarao City – Lumahok ang nasa 202 na Blood Donors sa inorganisang Blood Letting Activity ng Cagayan Police Provincial Office (PPO) na ginanap sa Robinsons Mall, Tuguegarao City noong Setyembre 23, 2022.
Mahigit 90,900 cc na dugo ang nalikom mula sa 202 donors na nakilahok sa aktibidad. Dumaan sa iba’t ibang screening ang mga donors upang masiguro ang kanilang kaligtasan at pati ang mga benepisyaryo ng nalikom na dugo.
Naging matagumpay ang aktibidad sa pangangasiwa ng Provincial Community Affairs and Development Unit sa pamumuno ni Police Lieutenant Cololonel Emil Pajarillo at sa pakikiisa at tulong ng Cagayan Valley Medical Center, Bureau of Fire Protection, Bureau of Jail Management and Penology, Philippine Army, Non-Government agencies, mga miyembro ng Kabataan Kontra Droga at Terorismo, Itawit Cagayan Valley Eagles Club, stakeholders at iba pang volunteers.
Naging tema ng aktibidad ang “Dugong Magiting, Donate Blood to Save Life”, na naglalayong makalikom, makatulong at makapagbahagi ng libreng dugo sa mga pasyenteng may malalang karamdaman at nangangailangan ng dugo upang madugtungan ang kanilang buhay at maibsan ang alalahanin ng kanilang mga pamilya.
Samantala, pinasalamatan naman ni Police Colonel Julio S Gorospe, Officer-In-Charge ng Cagayan PPO ang lahat ng mga blood donors na boluntaryong nakilahok sa aktibidad.
Siniguro naman ni Police Brigadier General Steve B Ludan, Regional Director ng Police Regional Office 2, na patuloy na maglilingkod at magpapaabot ng tulong ang mga miyembro ng Valley Cops sa mga mamamayan ng Lambak ng Cagayan bilang pagpapakita ng pagmamalasakit sa kapwa.
Source: Cagayan PPO
Panulat ni Police Corporal Carla Mae P Canapi
