Pormal nang nanumpa matapos ang ilang buwang screening process na isinagawa ng Police Regional Office 12-Recruitment and Selection Board sa libo-libong aplikante ang 200 na bagong pulis na Patrolman/Patrolwoman nito lamang araw ng Lunes, Disyembre 23, 2024 na idinaos sa Grandstand ng PRO 12, Tambler, General Santos City.
Pinangunahan nina Police Brigadier General Arnold P Ardiente, Officer-In-Charge ng PRO12 at Police Brigadier General Constancio T Chinayog Jr., Acting Director for Personnel and Records Management, ang nasabing oath-taking, na sinaksihan ng mga pamilya at kaibigan ng mga bagong pulis.
Mainit na binati ng panauhing pandangal na si PBGen Chinayog, ang mga recruits at sa naging mensahe nito, binigyang diin na ang pag-aaplay sa police service ay may kaakibat na hirap at malaking responsibilidad kaya’t kailangang pahalagahan ang kanilang serbisyo at maging responsableng unipormadong pulis na may malasakit at pagmamahal sa bayan.
Agad namang tinurn-over sa Regional Training Center 12, ang nasabing bagong pulis para sa pagsisimula ng kanilang Public Safety Basic Recruitment Course (PSBRC) upang sasailalim sa anim na buwang pagsasanay na magsisilbing pundasyon na magbibigay ng sapat na kaalaman upang mas magampanan ang kanilang mga tungkulin.
