Bacoor, Cavite — Arestado ang dalawang Wanted Person sa bisa ng Warrant of Arrest dahil sa online Swindling/Estafa ng mga operatiba ng Quezon City Police District nito lamang Nobyembre 1, 2022.
Kinilala ni Quezon City Police District (QCPD) Director, Police Brigadier General Nicolas D Torre III, ang mga suspek na sina Ikenna Onuoha, 37, Nigerian National, at Jacel Ann Paderan, 28, kapwa residente ng Camella Lessandra, Molino 1, Bacoor, Cavite.
Ayon kay PBGen Torree lll, bandang 5:45 ng hapon nang maaresto sina Onuoha at Paredan sa Almera St., Camella Lessandra, Molino 1, Bacoor, Cavite sa pinagsanib puwersa ng mga operatiba ng Quezon City- District Anti-Cybercrime Team/ Quezon City-Cyber Patrol Unit (QC-DACT/QC-CPU) kasama ang District Special Operation Unit (DSOU) ng QCPD.
Parehong may nakabinbin na Warrant of Arrest for Swindling/Estafa ang mga suspek na inisyu ni Hon. Maria Gilda T. Loja-Pangilinan, Presiding Judge ng Branch 230, Regional Trial Court (RTC), Quezon City.
Nag-ugat ang Warrant of Arrest sa reklamo ng biktima kay Onuoha na nakilala niya sa isang dating site (MeetMe) at nagkaroon ng relasyon na nagsimula noong Abril 2020 kung saan itinago ni Onuoha ang kanyang tunay na pagkakakilanlan at ipinakilala ang kanyang sarili bilang Demir Balik.
Sa kanilang relasyon, sinabi ni Onuoha sa kanyang biktima na pupunta siya sa Pilipinas, gayunpaman, humingi siya ng tulong pinansyal mula sa biktima dahil nagkaroon ng problema ang kanyang online banking account at sinabihan ang biktima na magpadala ng pera sa isang “Mohammed” na kalaunan ay nakilala bilang pinaghihinalaan si Paderan.
Nagpadala ng pera ang biktima kay Paderan na nagkakahalaga ng Php254,000 na idineposito sa kanyang RCBC account para maayos ang problema ng account ni Onuoha.
Bukod dito, ang suspek na si Onuoha ay paulit-ulit na humingi ng pera sa biktima kung saan ibinenta ng huli ang kanyang ari-arian upang maipadala ang pera sa mga suspek.
Noong Hulyo 15, 2020 ay lumapag umano ang suspek sa Cebu International Airport, gayunpaman, isang Stephanie Evangelista ang tumawag sa biktima at humingi ng Php650,000 bilang bayad sa Certificate of AMLAC para mailabas ang suspek ng pera na nagkakahalaga ng 1,000,000 dollars ngunit ang biktima ay kahina-hinala na at agad na inireport sa pulisya ang mga pangyayari.
Tinatayang Php2,282,000 ang halaga ng pera ang nakuha sa biktima.
Samantala, aabisuhan ang court of origin sa pagkakaaresto sa mga suspek.
“Pinapaalalahanan ko ang ating mga citizens na mag-ingat sa mga nakikilala sa online dating app. Maging mapanuri at huwag magpapaloko lalo na kung involved ang pera. Gamitin ang isip, at huwag puro puso,” saad ni PBGen Torre III.
Source: SMART PIO QCPD
Panulat ni PSSg Remelin M Gargantos
