Pasay City – Kinupkop at tinulungan ang dalawang babaeng Vietnamese Nationals ng Aviation Security Unit National Capital Region (AVSEU NCR) matapos tangkaing gipitin ng kapwa Vietnamese sa Binondo, Manila nitong ika-2 ng Mayo 2022.
Kinilala ng Hepe ng AVSEU NCR na si Police Colonel Cesar Gerente ang dalawang babaeng banyagang biktima na sina Lam Thi Ngoc Quynh at Dao Thanh Uyen na kapwa 24-taong gulang.
Ayon pa kay PCol Gerente, batay sa salaysay ng mga biktima, sila ay pinangakuan ng trabaho upang maging waitress sa Pilipinas ng isang babae na kilala lamang nila sa pangalang Hao-Hao sa kanyang Facebook Account subalit laking gulat ng mga ito na hindi waitress ang kanilang inaasahang trabaho.
Ayon pa sa mga biktima, inipit ng suspek ang kanilang pasaporte nang hindi sila pumayag sa trabahong pinangako niya at sinabing bayaran ang lahat ng kanyang nagastos sa paglipad ng mga ito sa bansa kung kaya tumakas ang mga ito.
Ayon naman sa hepe ng AVSEU NCR, kinupkop at tinulungan ng kanilang tanggapan upang magkaroon ng panandaliang tutuluyan ang mga biktima at maidulog sa Vietnam Embassy ang kanilang problema at mabigyan sila ng kaukulang tulong habang naghihintay magbukas ang tanggapan dahil sa mga holidays na nagdaan.
Kasalukuyang nasa kustodiya na ng Vietnam Embassy ang mga naturang biktima.
Samantala, nagpahayag naman si PCol Gerente na mananatiling nakahanda ang kanilang tanggapan na tumugon sa mga nangangailangan ng tulong sa lahat maging sa mga banyagang panandaliang naninirahan sa ating bansa.
###
