Rizal, Laguna – Arestado ang dalawang suspek sa kasong paglabag sa RA 9287 sa isinagawang operasyon ng Laguna PNP nito lamang Lunes, Hulyo 11, 2022.
Kinilala ni Police Captain Raul Ramon Ayon, Acting Chief of Police ng Rizal Municipal Police Station, ang dalawang suspek na sina Jellie Corcega, 30, at Antoinio Alarva, 43, pawang mga residente ng residente ng Brgy. Antipolo, Rizal, Laguna.
Ayon kay PCpt Ayon, bandang 6:45 ng hapon, naaresto ang mga suspek sa naturang barangay sa isinagawang joint operation laban sa illegal gambling ng pinagsanib na pwersa ng Rizal MPS at Provincial Special Operating Group.
Ayon pa kay PCpt Ayon, ang dalawang suspek ay naaktuhang nangongolekta ng bet money na walang papel at identification mula sa Ramloid Corporation na otorisadong nagpapalaro ng small town lottery.
Nakumpiska sa mga suspek ang ilang pirasong collection report form o lastillas, dalawang itim na ballpen na may trademark na Flexstick, Php1,367 na pera, at isang itim na Casio calculator.
Nahaharap ang mga suspek sa kasong paglabag sa Republic Act 9287 o Act increasing the Penalties of Illegal Number Games, amended by Presidential Decree No. 1602.
Hinihikayat ng PNP ang mamamayan na patuloy na suportahan ang kampanya laban sa ilegal na sugal at huwag makisangkot sa anumang gawaing ilegal dahil ang buong PNP ay patuloy na tutugis sa mga nagkakasala sa batas.
###
Panulat ni Police Executive Master Sergeant Joe Peter Cabugon
