Maguindanao del Sur – Patay ang dalawang pulis habang sugatan naman ang apat pa nilang kasamahan sa nangyaring pananambang ng mga hndi pa natutukoy na armadong kalalakihan sa Brgy. Poblacion, Shariff Aguak, Maguindanao del Sur nito lamang ika-14 ng Hunyo 2023.
Kinilala ni Police Brigadier General Allan Nobleza, Regional Director ng PRO BAR, ang mga napatay na sina Patrolman Saipoden Macacuna at Patrolman Bryan Dalao Polayagan habang sugatan naman sina PCMS Rey Vincent Gertos, PSSg Benjie Delos Reyes, Pat Abdulgafor Alib, at Pat Arjie Val Loie Pabinguit, na pawang mga nakatalaga sa 1st Platoon 2nd PMFC, Maguindanao del Sur PPO.
Ayon kay PBGen Nobleza, pabalik na sana ng Maguindanao Del Sur PPO headquarters ang tropa matapos magsagawa ng mobile patrol sa kanilang area of responsibility sa naturang munisipalidad nang bigla na lamang tinambangan ng hindi pa nakikilalang mga armadong kalalakihan.
Kaagad namang rumesponde ang mga tauhan ng Maguindanao del Sur PPO at Special Action Force upang magsagawa ng clearing operation sa pinangyarihan ng pananambang.
Ang mga sugatang biktima ay dinala sa Integrated Provincial Health Office Maguindanao para sa agarang lunas kung saan idineklara ng attending physician na dead on arrival ang dalawang biktima habang ang apat na sugatang pulis ay dinala sa Sultan Kudarat Provincial Hospital sa Isulan para sa karagdagang medikal na atensyon, habang ang dalawang bangkay ay dinala ng kanilang mga pamilya para sa Muslim burial.
Pinangunahan naman ni PBGen Nobleza, ang pagbuo ng Special Investigation Task Group upang imbestigahan ang nangyaring pananambang at mariing kinokondena nito ang insidente. Aniya ay magsasagawa ng mabilis na imbestigasyon sa insidente para matukoy ang mga suspek at masampahan ng kaukulang kasong kriminal, na magbibigay ng hustisya sa mga naging biktima ng pananambang.
Panulat ni Patrolman Charlie Nasroden Corpuz
