Davao de Oro – Arestado ang dalawang vlogger dahil sa kanilang prank na nagdulot ng alarma sa isang gasoline station sa Brgy. Nueva Visayas, Mawab, Davao De Oro, noong Enero 18, 2023.
Kinilala ni Police Major Delia Gesultura, Acting Chief of Police ng Mawab Municipal Police Station, ang mga suspek na sina alyas “Jonel” at “Arnold” ng Cordero Brothers Facebook page na may content na mga prank videos at pawang mga residente ng nasabing lugar.
Ayon kay PMaj Gesultura, lumalabas sa imbestigasyon na bumili umano ang dalawa ng gasolina sa halagang Php10 at pagkatapos ay nagkunwaring ininom ni Jonel at nagkunwaring nahilo.
Dagdag pa ni PMaj Gesultura, agad na tumawag sa Municipal Disaster Risk Reduction and Management Office (MDRRMO) Mawab ang mga tauhan ng gas station kaya mabilis itong nirespondehan ng mga rescuers at habang tinutulungan si Jonel ay bigla itong nagsabi ng “it’s a prank!”.
Samantala, pansamantalang pinalaya ang mga suspek dahil sa umabot na sa reglamentary period upang magsampa ng kaukulang kaso.
Patuloy naman sa pagsasagawa ng imbestigasyon ang Police Regional Office 11 at nagpaalala na huwag gumawa ng mga content na magdudulot ng panganib o takot sa mga mamamayan upang maiwasang lumabag sa batas.
Panulat ni Patrolman Alfred Vergara
